As Noites Poéticas d’A Pipa comezaron o 28 de decembro de 1996 con Uxío Novoneyra. Desde aquela ata o 2008 celebramos dezasete veladas, das que foron protagonistas: Manuel María (28/12/1997), Helena Villar Janeiro (26/07/1998), María Xosé Queizán (28/12/1998), María do Carme Kruckenberg (28/12/1999 e 29/12/2000), Chus Pato (28/12/2000), Marica Campo (28/12/2001), Xesús Rábade Paredes (28/12/2002), María do Cebreiro (29/12/2002), Cristal Méndez Queizán (28/12/2003), Bernardino Graña (2/01/2005), Darío Xohán Cabana (28/12/2005), Anisia Miranda e Xosé Neira Vilas (27/12/2006), Manuel Lourenzo (29/12/2007), María Xosé Queizán (27/12/2008), e Manuel Rivas (28/12/2008).

As Noites Poéticas d’A Pipa son unha homenaxe ás escritoras e aos escritores da literatura galega. Trátase dun achegamento directo ao seu labor creativo, á súa filosofía e á súa persoa. A velada consta de, polo menos, tres partes. Na primeira establécese unha conversa distendida coa escritora ou escritor, guiada por membros d’A Pipa, na que está convidado a participar todo o público. A segunda parte soe ser un espectáculo teatral con textos do autor/a homenaxeado/a, que será, asemade, quen faga o recital co que se pecha o acto. E como as Noites Poéticas son unha festa da palabra. A palabra literaria e a encarnada na acción teatral. Non pode haber unha festa sen un brinde e un cóctel final.